Bandaríska poppstjarnan Britney Spears hefur skráð sig inn á meðferðarstofnun eftir að hún var handtekin í síðasta mánuði grunuð um ölvunarakstur nálægt Los Angeles, samkvæmt fréttum bandarískra fjölmiðla í gærþ
Söngkonan, sem er 44 ára, var handtekin í byrjun mars og færð í varðhald af lögreglunni í Ventura-sýslu vegna gruns um akstur undir áhrifum áfengis. Hún var síðar látin laus, en talsmaður hennar sagði við það tilefni að atvikið væri „algerlega óafsakanlegt“ og að Spears hygðist „gera það sem rétt er og fara að lögum,“ að því er fram kemur hjá miðlinum Deadline.
Á sunnudag greindu nokkrir bandarískir fjölmiðlar frá því að Spears hefði sjálfviljug skráð sig inn á meðferðarstofnun. Ekki liggur fyrir nákvæmlega hvenær hún hóf meðferðina.
Spears á að mæta fyrir dóm þann 4. maí vegna málsins, samkvæmt upplýsingum frá Los Angeles Times.
Spears sló í gegn seint á tíunda áratugnum með vinsælum lögum á borð við …Baby One More Time en hefur á undanförnum árum dregið sig í hlé frá tónlistarferli sínum.
Í ævisögu sinni, The Woman in Me, sem kom út árið 2023, fullyrti Spears að hún hefði aldrei neytt harðra fíkniefna og ætti ekki við áfengisvanda að stríða. Hún viðurkenndi þó að hafa notað lyfið Adderall, sem er notað við ADHD.
Árið 2007 var Spears sett undir forræði föður síns, Jamie Spears, sem hafði umsjón með fjármálum hennar og einkalífi um árabil, þrátt fyrir áframhaldandi tónleikahald. Því fyrirkomulagi lauk árið 2021 eftir umfangsmikinn stuðning almennings við svokallaða „Free Britney“-hreyfingu.
Athugasemdir