Mikill eldsvoði í hóteli í Nýju Delí á Indlandi kostaði að minnsta kosti 21 mann lífið á miðvikudag. Tugir slösuðust í brunanum sem braust út á gistiheimilinu Flourish Stay í þéttbýlu hverfi í suðurhluta borgarinnar. Þetta er einn mannskæðasti bruni sem orðið hefur í höfuðborg Indlands á síðustu árum.
Samkvæmt upplýsingum frá lögreglu voru 47 gestir í byggingunni þegar eldurinn kviknaði snemma morguns. Yfir 40 manns voru fluttir á sjúkrahús og eru nokkrir þeirra sagðir í lífshættu.
Sjónarvottar lýstu mikilli ringulreið þegar fólk reyndi að flýja eldinn. Sumir sem voru fastir á efri hæðum hússins stukku út um glugga á dýnur sem íbúar í nágrenninu höfðu lagt út á götuna.
Slökkviliðsmenn börðust við eldinn með aðstoð átta slökkvibifreiða áður en tókst að ná tökum á honum. Rannsókn stendur nú yfir á upptökum brunans en fyrstu upplýsingar benda til þess að brunavarnir hússins hafi verið lélegar. Meðal annars hefur verið greint frá því að aðeins ein útgönguleið hafi verið úr byggingunni.
Narendra Modi, forsætisráðherra Indlands, lýsti yfir samúð með aðstandendum hinna látnu og kallaði slysið hörmulegt.
Athugasemdir