Rockstar Games tilkynnti í dag að forsala á tölvuleiknum Grand Theft Auto VI hefjist þann 25. júní næstkomandi. Leikurinn, sem er einn sá eftirsóttasti í sögu tölvuleikjaiðnaðarins, er áætlaður til útgáfu 19. nóvember eftir að útgáfu hans hefur verið frestað tvívegis.
GTA VI er áttunda aðalútgáfan í Grand Theft Auto-leikjaröðinni og kemur út rúmum 13 árum eftir GTA V, sem er næstsöluhæsti tölvuleikur sögunnar. Rockstar Games, sem er í eigu bandaríska fyrirtækisins Take-Two Interactive, greindi frá forsöludeginum á samfélagsmiðlinum X og staðfesti að hægt verði að forpanta leikinn bæði á stafrænum söluvettvöngum og hjá völdum smásöluaðilum.
Leikurinn gerist í Vice City, borg sem sækir innblástur til Miami, og mun í fyrsta sinn í sögu leikjaraðarinnar bjóða upp á kvenkyns aðalpersónu sem leikmenn geta stjórnað.
Grand Theft Auto-serían hefur um árabil notið gríðarlegra vinsælda en jafnframt sætt gagnrýni fyrir ofbeldis- og glæpaþemu. Framleiðendur hafa hins vegar hafnað því að leikirnir hvetji til glæpsamlegrar hegðunar og benda á að um skáldað afþreyingarefni sé að ræða.
Athugasemdir