Frakkland hefur tekið upp nýjar reglur um greitt fæðingarorlof sem veita bæði mæðrum og feðrum aukinn rétt til orlofs í kjölfar barneigna. Reglurnar tóku gildi í dag og eru liður í aðgerðum stjórnvalda til að bregðast við sífellt lægri fæðingartíðni í landinu.
Forseti Frakklands, Emmanuel Macron, kynnti á síðasta ári áætlun sem miðar að því að vinna gegn ófrjósemi og hvetja til fjölgunar fæðinga. Hann sagði þá að markmiðið væri að styrkja lýðfræðilega stöðu landsins.
Fram til þessa höfðu mæður í Frakklandi rétt á tæplega fjögurra mánaða launuðu fæðingarorlofi vegna fyrsta barns, en feður gátu tekið allt að 28 daga launað orlof eftir fæðingu.
Samkvæmt nýju reglunum geta foreldrar nú skipt á milli sín einum eða tveimur viðbótarmánuðum í launuðu foreldraorlofi, til viðbótar við þann rétt sem fyrir var. Á fyrsta viðbótarmánuðinum fá foreldrar greidd 70 prósent af nettólaunum sínum en 60 prósent á þeim síðari.
Rétturinn nær til foreldra barna sem fædd eru 1. janúar 2026 eða síðar og gildir einnig um kjörforeldra.
Fæðingartíðni hefur farið lækkandi víða innan ESB undanfarin ár. Í Frakklandi fæddust á síðasta ári, í fyrsta sinn frá lokum síðari heimsstyrjaldarinnar, færri börn en þeir sem létust á sama tímabili, samkvæmt upplýsingum frá frönsku hagstofunni.
Femínísk samtök hafa gagnrýnt breytingarnar og telja þær ekki ganga nógu langt til að stuðla að auknu jafnrétti á vinnumarkaði. Þau benda meðal annars á að líklegra sé að sá foreldri sem hefur lægri tekjur, oftast móðirin, taki stærri hluta viðbótarorlofsins.
Athugasemdir