Notendur rafhlaupahjóla og annarra vélknúinna smáfarartækja í París þurfa nú að bera hjálm og vera í endurskinsfatnaði samkvæmt nýjum öryggisreglum sem tóku gildi á föstudag. Reglurnar voru settar í kjölfar mikillar fjölgunar alvarlegra slysa.
Reglurnar gilda í París og nærliggjandi úthverfum og ná meðal annars til rafhlaupahjóla og Segway-tækja. Lögregla segir notkun slíkra farartækja hafa aukist verulega á undanförnum árum.
Leigurafhlaupahjól hafa verið bönnuð á götum Parísar frá árinu 2023, þegar borgarbúar samþykktu bannið í atkvæðagreiðslu vegna áhyggna af umferðaröryggi. Rafhlaupahjól í einkaeigu eru hins vegar áfram mikið notuð í frönsku höfuðborginni.
Að sögn lögreglu var ákveðið að herða reglurnar vegna fjölgunar slysa þar sem notendur vélknúinna smáfarartækja koma við sögu. Verulegur hluti alvarlegra og banvænna slysa hefur leitt til höfuðáverka.
Alls létust 79 óvarðir vegfarendur í Frakklandi árið 2025, þar á meðal fjölmargir notendur vélknúinna smáfarartækja. Til samanburðar létust 45 árið áður. Lögreglan í París vísar þar til upplýsinga frá frönskum umferðaröryggisyfirvöldum.
Þá slösuðust um 1.100 notendur rafhlaupahjóla alvarlega á síðasta ári. Það er 33 prósenta fjölgun frá árinu 2024.
Þeir sem aka án hjálms eiga yfir höfði sér 135 evra sekt, sem jafngildir um 19 þúsund íslenskum krónum. Þá getur skortur á endurskinsvesti eða öðrum sýnilegum endurskinsbúnaði varðað 35 evra sekt. Reglurnar gilda allan sólarhringinn á opinberum vegum.
Fleiri evrópskar borgir hafa hert reglur um rafhlaupahjól á undanförnum árum. Madríd bannaði leigurafhlaupahjól árið 2024 og yfirvöld í Brussel tilkynntu í júní að borgin hygðist feta sömu braut.
Athugasemdir