Þrír menn létust í skotbardaga við lögreglu í Egyptalandi eftir að hópur manna stal 105 kílóum af kjúklingakjöti úr vöruflutningabíl á ferð á hraðbraut í Kaíró. Þrír aðrir voru handteknir í aðgerðum lögreglu.
Myndband af þjófnaðinum hefur vakið mikla athygli á samfélagsmiðlum. Þar sjást tveir menn færa kassa úr vöruflutningabílnum yfir í pallbíl á meðan bæði ökutækin eru á ferð. Atvikið hefur verið borið saman við atriði úr hasarmyndunum Fast & Furious.
Ökumaður vöruflutningabílsins sagði lögreglu að um fjögur tonn af kjúklingakjöti hefðu verið í bílnum. Hann varð ekki var við þjófnaðinn þegar hann átti sér stað en uppgötvaði síðar að 105 kíló vantaði úr farminum.
Innanríkisráðuneyti Egyptalands greindi frá því að rannsókn málsins hefði leitt lögreglu á slóð sex manna sem allir hefðu áður komið við sögu lögreglu.
Þegar lögregla hugðist handtaka mennina kom til skotbardaga milli þeirra og lögreglumanna. Þrír hinna grunuðu létust í átökunum en hinir þrír voru handteknir.
Lögregla lagði jafnframt hald á skotvopn og ökutækið sem talið er hafa verið notað við þjófnaðinn.
Málið hefur vakið talsverða athygli í Egyptalandi, ekki síst vegna þess hversu óvenjuleg og hættuleg aðferðin við þjófnaðinn var.
Athugasemdir