Um 30 vélmenni gengu fylktu liði um götur Varsjár í Póllandi á mánudag og kölluðu eftir auknu regluverki um gervigreind og vélvæðingu. Mótmælin fóru fram fyrir utan ráðuneyti stafrænna mála og vöktu töluverða athygli vegfarenda.
Vélmennin veifuðu fánum, gengu í hringi og úr hátölurum ómuðu slagorð á borð við „Verndum störfin“, „Tími á reglur“ og „Ekki bíða, setjið reglur“.
Aðgerðin var skipulögð af samtökunum Democratism, sem vilja efna til umræðu um áhrif gervigreindar og vélvæðingar á vinnumarkaðinn. Meðal þátttakenda voru bæði manngerð vélmenni sem gengu á tveimur fótum og fjórfætt vélmenni sem líktust hundum.
„Vélmennin hér eiga að sýna að þessi tækni er þegar orðin að veruleika,“ sagði Agibot A3, eitt manngerðu vélmennanna, í samtali við AFP.
Grzegorz Kulis, skipuleggjandi aðgerðarinnar, sagði sérstaka ástæðu til að ræða hættuna á að vélmenni og gervigreind leysi fólk af hólmi á vinnumarkaði. Það ætti bæði við um störf sem krefjast líkamlegrar vinnu og störf þar sem hugræn færni er í forgrunni.
„Ef við bregðumst ekki við núna gætum við fljótlega staðið frammi fyrir vandamáli,“ sagði Kulis. Að hans mati þurfi skýrar reglur sem verndi launafólk fyrir hröðum tæknibreytingum.
Krzysztof Gawkowski, ráðherra stafrænna mála í Póllandi, mætti á vettvang og ræddi við skipuleggjendur. Hann sagði stjórnlausa þróun gervigreindarlíkana, sérstaklega þegar þau væru tengd manngerðum vélmennum, geta skapað verulegar áskoranir.
Pólsk stjórnvöld hafa þegar stigið skref í átt að auknu eftirliti. Karol Nawrocki forseti undirritaði í júlí lög sem innleiða gervigreindarlöggjöf Evrópusambandsins í Póllandi. Með lögunum var komið á fót innlendu stjórnvaldi sem hefur það hlutverk að framfylgja reglum sambandsins um gervigreind.
Athugasemdir