Fjögurra ára gömul stúlka er illa haldin eftir að hún var nálægt því að drukkna í sundlaug í Lago Taurito vatnagarðinum á Kanarí

Samkvæmt fjölmiðlum ytra var barnið dregið upp úr vatninu í hjarta- og öndunarstoppi á mánudaginn. Björgunarsveitarmenn við laugina hófu strax endurlífgun á meðan neyðarteymi voru send á vettvang.

Heilbrigðisstarfsmenn segja að stúlkan hafi nærri drukknað og orðið fyrir alvarlegum höfuðáverka. Hún var flutt með sjúkraþyrlu á nærliggjandi sjúkrahús samkvæmt upplýsingum fjölmiðla.

Slysið er í rannsókn að sögn yfirvalda en ekkert hefur verið sagt til um þjóðerni stúlkunnar.

Annað slysið á átta mánuðum

Þetta gerðist aðeins nokkrum mánuðum eftir hörmulegt drukknunarslys í sama vatnsrennibrautagarði. Í apríl lést tveggja ára stúlka eftir að hún festist undir uppblásnum leikföngum í sundlaug. Þrátt fyrir skjót viðbrögð og endurlífgunartilraunir frá neyðarteymum var andlát hennar staðfest á vettvangi.

Yfirvöld hvetja til ýtrustu aðgátar í kringum sundlaugar, sérstaklega þegar ung börn eru viðstödd.