Karlmaður frá Selfossi hefur verið sakfelldur fyrir umferðar- og siglingarlagabrot og fyrir að hóta manni. Málið var tekið fyrir í Héraðsdómi Suðurlands.
Sendi maðurinn öðrum manni þrjár hótanir í gegnum tölvupóst árið 2022 og bárust allir póstarnir sama dag.
Tölvupóstarnir þrír
Kl. 19:11: „Þið eruð þjófar og þið rænið börnum og misnotið þau, þið eruð sjúkir fucking barnaníðingar…. Ég mun finna ykkur í helvíti“
Kl. 19:12: „Ég mun persónulega finna þig og drepa þig fyrir framan fjölskylduna þína ef þú nokkurn tímann aftur rukkar mig um svo mikið sem eina krónu.“
Kl. 19:17: „Það eru bara tveir með þínu nafni í símaskránni, ég er búinn að taka skjáskot… Ef þú innheimtir meiri pening frá mér á meðan þið haldið barninu mínu læstu inni á sjúkrahúsi… Mun ég koma og drepa þig fyrir framan fucking fjölskyldu þína.. Ég mun birtast einn daginn og brjóta hvert bein í andlitinu á þér fyrir framan börnin þín þangað til heilinn á þér springur á þau. Barnaníðings ógeðið þitt!!!!“
Þá var hann einnig dæmdur fyrir umferðar- og siglingarlagabrot og brot gegn lögum um áhafnir skipa með því að hafa, sunnudaginn 16. júní 2024, stjórnað hjólabát, sem er þiljað farþegaskip, á Jökulsárlóni og ekið farþegaskipinu þaðan upp á land og að landgöngupramma á afmörkuðu athafnarsvæði á landi, óhæfur til að stjórna hjólabátnum örugglega og óhæfur til að rækja starfann á fullnægjandi hátt vegna áhrifa ávana- og fíkniefna. Enn fremur með því að hafa umrætt sinn haldið úr höfn án þess að hafa, sem skipstjóri farþegaskipsins, gætt að því að hann sjálfur væri lögskráður á skipið.
Maðurinn játaði brot sín og var dæmdur í 30 daga fangelsi og er dómurinn skilorðsbundinn til tveggja ára. Hann þarf að greiða 530.000 krónur í ríkissjóð innan fjögurra vikna frá birtingu dóms þessa en sæti ella fangelsi í 28 daga.
Þá var hann sviptur ökurétti í 3 ár og skipstjórnarréttindum í þrjá mánuði.
