Boðað hefur verið til mótmæla við Utanríkisráðuneytið á morgun 3. mars klukkan 16:00. Aðstandendur mótmælanna krefjast þess að íslensk stjórnvöld fordæmi opinberlega þær árásir sem Bandaríkin og Ísrael hafa gert á Íran, sem þeir segja ólöglegar samkvæmt alþjóðarétti.
Í viðburðalýsingu segir að jafnframt sé krafist tafarlausra upplýsinga um hvort íslensk grund hafi verið notuð í tengslum við árásirnar. Þar er vísað til breytinga á varnarsamkomulagi Íslands og Bandaríkjanna frá fyrri forsetatíð Donalds Trump, sem hafi „vakið alvarlegar áhyggjur um að Ísland geti verið nýtt sem aðstaða fyrir hernaðaraðgerðir“.
Aðstandendur mótmælanna segja nauðsynlegt að fá skýr svör um hvort slík aðstaða hafi í raun verið veitt í tengslum við árásirnar á Íran, enda hafi sérfræðingar bent á að það sé möguleg sviðsmynd. Þá er sérstaklega minnt á að í árásunum hafi meðal annars verið gerðar loftárásir á tvo grunnskóla á skólatíma, þar sem yfir hundrað börn voru myrt.
Í viðburðalýsingunni kemur einnig fram að Utanríkisráðuneytið hafi hvorki staðfest né hafnað því hvort íslenskt landsvæði hafi verið notað í tengslum við hernaðaraðgerðirnar og að ráðuneytið hafi ekki fordæmt árásirnar opinberlega.
„Við krefjumst gagnsæis, ábyrgðar og skýrrar afstöðu,“ segir að lokum í áskorun mótmælenda, sem hvetja almenning til að mæta og þrýsta á stjórnvöld um svör.
