Rúmgóð íbúð í tvíbýli við Laugarnesveg 63 í Reykjavík hefur verið sett á sölu með ásett verð upp á 98,9 milljónir króna. Eignin er samtals 152,3 fermetrar að stærð og var húsið byggt árið 1943.

Það eru þau Albert Finnbogason og Ásthildur Ákadóttir selja íbúðina en Albert er einn færasti upptökustjóri landsins. Hefur hann unnið meðal annars með Páli Óskari, Ólöf Arnalds, Snorra Helgasyni og Benna Hemm Hemm.

Þá var hann meðlimur í hljómsveitunum Grísalappalísu og Big Kahuna og er Ásthildur í hljómsveitinni Pascal Pinon.

Íbúðin skiptist á tvær hæðir og býður upp á rúmgóða stofu, eldhús, svefnherbergi, tvö baðherbergi og þvottahús. Auk þess fylgir eigninni rúmgóður bílskúr. Þrjú bílastæði tilheyra íbúðinni og fjórða stæði er í sameign.

Samkvæmt upplýsingum úr sölulýsingu er möguleiki á að loka stigagati og útbúa séríbúð á neðri hæðinni. Þar var áður eldhús í einu svefnherbergjanna, sem gæti auðveldað slíkar breytingar.

Eignin er staðsett á vinsælum stað í Laugarnesi, sem hefur notið aukinna vinsælda undanfarin ár vegna nálægðar við miðborgina og góða útivistarmöguleika. Íbúðin gæti því hentað bæði fjölskyldum sem leita að rúmgóðu heimili og þeim sem vilja skoða möguleika á tvíbýli eða leigutekjum.