Borgarráð samþykkti í dag ráðningu Ingunnar Ólafsdóttur sem innri endurskoðanda Reykjavíkurborgar en þetta kemur fram í tilkynningu frá borginni.

Ingunn býr yfir, samkvæmt borginni, yfirgripsmikilli reynslu af innri endurskoðun, innra eftirliti og stjórnsýsluendurskoðun sem spannar hátt í tvo áratugi.

Ingunn er fagvottaður innri endurskoðandi (CIA) og er auk þess með vottun í áhættustjórnun (CRMA). Hún er með B.A. gráðu í stjórnmálafræði frá Háskóla Íslands, M.A. gráðu í evrópskum stjórnsýslufræðum frá KU Leuven í Belgíu og M.A. gráðu í alþjóðasamskiptum frá University of Kent í Englandi.

Ingunn hefur verið starfandi innri endurskoðandi Reykjavíkurborgar í tæp tvö ár en þar áður var hún fagstjóri innri endurskoðunar og staðgengill innri endurskoðanda frá árinu 2021. Áður var hún innri endurskoðandi Háskóla Íslands um sex ára skeið og byggði þar upp innri endurskoðun háskólans og tengdra stofnana frá grunni, mótaði verklag, kom að stofnun endurskoðunarnefndar og vann í nánu samstarfi við rektor, æðstu stjórnendur og Ríkisendurskoðun. Þar áður var hún meðal annars verkefnastjóri í áhættuþjónustu Deloitte.