„Þetta er erfitt líf enda eldist hú neins og banani, mikið lagt á herðar Kristjáns,“ valdi Sævar Karlsson að lýsa yfir um Þorgerði Katrínu Gunnarsdóttur utanríkisráðherra og eiginmann hennar, Kristján Arason, fyrir alþjóð.
Þorgerður hefur nú ákveðið að svara honum og öðrum sem hafa ávarpað hana á Facebook, með myndbandi þar sem hún bregst við kommentakerfinu.
„Þetta er ein mesta móðgun sem ég hef fengið á samfélagsmiðlunum núna síðustu daga. Að líkja mér við banana. Það vita allir sem mig þekkja að ég þoli ekki banana. Ég hefði frekar viljað „mygluð appelsína“ eða eitthvað, en ekki banani. Þannig að ég tek þetta mjög nærri mér,“ svarar Þorgerður.
„Þú ert landráðatrunta, það á að loka þig inn í búri,“ skrifar Guðmundur Max nokkur á Facebook. „Búr? Mér líður ekki vel inni í búri og það bara eiga allir að vera frjálsir,“ svarar hún.
„Meiri orgían þetta stjórnarsamstarf,“ segir Þorsteinn Erlingsson, ekki skáld.
„Það er mjög gaman hjá okkur Ingu og Kristrúnu. Það bara nokkuð skemmtileg orgía þar í gangi,“ svarar Þorgerður
„Algerlega ósammála því, en ég sé að þú ert kominn með fimmtíu og eitthvað læk, allt frá körlum,“ segir hún við Eli Uno nokkurn, sem hafði hellt úr skálum visku sinnar: „Ég er farinn að halda að konur séu óhæfar í stjórnmálum … skemma meira en þær laga“.
Einn þeirra, Ægir Máni Bjarnason, gengur lengra en flestir. „Hún er stríðsglæpamaður og ekkert annað. Vonandi fær hún dauðarefsinguna,“ lýsir hann fjálglega yfir.
„Ég er nú á móti dauðarefsingum, bara svona í prinsippinu,“ svarar Þorgerður.
„Setja þig í gapastokk! Þú hefðir gott af því,“ segir Sigurður Valdimar Steinþórsson.
„Nei, hann hentar mér ekki,“ svarar Þorgerður. „Ekki spennt fyrir honum.“
Theodór Hertervig lætur þau fleygu orð falla: „Út með gæruna.“
„Gæruna? Íslenska gæran er mjög fín. Ég styð hana.“
Anna Fia spyr Þorgerði beint út: „Þorgerður Katrín, hvenær ætlar þú að hætta að vinna hjá ríkisstjórninni?“
„Ég var nú kosin til fjögurra ára,“ svarar Þorgerður. „Þrjú ár eftir. Við sjáum til hvort við fáum ekki bara endurkjör.“
„Ertu ekki í brjóstahaldara hjá Gísla Marteini,“ spyr einn með bíl í prófílmynd.
„Ég var reyndar í brjóstahaldara hjá Gísla Marteini. En hann var hlýralaus haldari.“
„Farðu i frí. Plís, segir Karlsson nokkur og Þorgerður þakkar honum.
„Þetta finnst mér nú vera gott ráð,“ segir hún og lýsir því að hún sé einmitt í Þýskalandi á leið í helgarfrí.
