Samkvæmt dagbók lögreglunnar á höfuðborgarsvæðinu gista þrír í fangageymslu lögreglu eftir gærkvöldið og nóttina. Hér má sjá nokkur dæmi um verkefni lögreglunnar.
Í miðborginni var tilkynnt um brjálaðan aðila eins og það er orðað í dagbókinni en reyndist hann eftirlýstur. Ekki fylgdi frásögninni hvort aðilinn hafi verið handsamaður eða ekki.
Í Laugardalnum var framleiðsla fíkniefna upprætt.
Lögreglan við Hlemm handtók fimm ökumenn fyrir ölvunar- og/eða fíkniefnaakstur víða um varðsvæðið.
Þá var manneskja handtekin í miðborginni fyrir að pissa á almannafæri og segja ekki til nafns.
Í Hafnarfirði bárust tilkynningar um þakplötur sem fuku í slagviðrinu í gær.
Að lokum segir frá umferðarslysi í dagbókinni en það gerðist í Múlunum í Reykjavík en einn var fluttur á slysadeild og voru tvær bifreiðar dregnar af vettvangi. Var annar ökumaðurinn handtekinn fyrir ölvunarakstur.
