Bassi Maraj, tónlistarmaður og raunveruleikastjarna, hefur verið ákærður fyrir heiftarlega líkamsárás gegn leigubílsstjóra.

Í ákærunni kemur fram að Bassi hafi veist að leigubílstjóra í Bryggjuhverfinu í Árbænum þann 11. febrúar 2023 með ofbeldi. Hann hafi bitið í hnakka hans og vinstri öxl, kýlt hann með krepptum hnefa í ennið, tekið hann kverkataki og vafið snúru úr greiðsluposa um háls leigubílstjórans með þeim afleiðingum að bílstjórinn hlaut tognun á hálsi, blæðingu undir slímhúð hægra auga, bitför og mar á hægri öxl og upphandlegg auk yfirborðsáverka á háls og vinstri úlnlið.

Þá á hann einnig að hafa hótað að drepa leigubílstjórann, með því að segja: „Komdu með símann minn eða ég fokking drep þig.“

Hann er sömuleiðis ákærður fyrir að hafa haft á sér 0,08 grömm af amfetamíni sem lögregla fann við öryggisleit á honum á lögreglustöðinni við Hverfisgötu.

Bassi er ákærður fyrir að hafa brotið grein hegningarlaga sem hljóða svo: „Hver, sem gerist sekur um líkamsárás, enda sé hún ekki svo mikil sem í 218. gr. segir, skal sæta sektum eða fangelsi allt að 6 mánuðum, en fangelsi allt að 1 ári, ef háttsemin er sérstaklega vítaverð,“ en í grein 218 er fjallað um alvarlegri líkamsárásir.

Þess er krafist að hann verði dæmdur til refsingar og til greiðslu alls sakarkostnaðar. Þá vill leigubílstjórinn að Bassi verði dæmdur til að greiða sér 1.572.000 krónur í skaðabætur auk vaxta.

Málið verður tekið fyrir í Héraðsdómi Reykjavíkur.

Bassi hefur verið mikið í sviðsljósinu síðan hann sló í gegn í raunveruleikasjónvarpsþættinum Æði ásamt Binna Glee og Patreki Jamie árið 2020 og hafa verið gerðar fjórar seríur af þáttaröðinni vinsælu. Síðan þá hefur hann gefið út efni sem rappari með lögum á borð við Áslaug Arna, Bassi Maraj og Kúreki.