Algjör þögn ríkir hjá Þorgerði Katrínu Gunnarsdóttur en Mannlíf hefur sóst eftir viðbrögðum frá utanríkisráðherranum í kjölfar drápa Ísraelshers á 20 óbreyttum borgurum, þar af fimm blaðamönnum, á Nasser-spítala á Gaza á dögunum.

Árásin hefur verið fordæmd um allan heim en hún virtist hafa verið gerð gagngert til þess að drepa blaðamennina en fjórum eldflaugum var skotið á utanáliggjandi stigagang sjúkrahússins, þar sem blaðamenn voru vanir að safnast saman á þar sem WiFi-sambandið var hvar best. Ísraelsher sprengdi fyrst blaðamennina og biðu svo þar til heilbrigðisstarfsmenn og aðrir reyndu að koma þeim til bjargar, og gerðu þrjár árásir til viðbótar en alls voru 20 manns drepnir í árásunum.

Pressan hefur aukist á íslensk yfirvöld um almennileg viðbrögð vegna þjóðarmorðsins undanfarið en þann 6. september verður haldinn fjöldafundur á Austurvelli þar sem ríkisstjórn Kristrúnar Frostadóttur er hvött til þess að hætta því að vera meðsek þjóðarmorðinu með aðgerðarleysi sínu.

Mannlíf sendi spurningar á utanríkisráðherrann fyrir þremur dögum síðan þar sem spurt var hvort Þorgerður Katrín hyggðist bregðast við hinni skelfilegu árás á blaðamennina og hin 15 fórnarlömbin og þá hvernig, ef svarið væri já. Þá spurði Mannlíf einnig hvort hún hefði fundið fyrir þrýstingi frá bandarískum yfirvöldum um að passa orð sín og gjörðir gagnvart Ísrael.

Strax sama dag svaraði upplýsingafulltrúi utanríkisráðuneytisins, Ægir Þór Eysteinsson þar sem hann þakkaði fyrir spurningarnar og sagðist verða í bandi. Síðan þá hefur Mannlífi ekki enn borist svar frá Þorgerði Katrínu, þrátt fyrir tvær ítrekanir.