Elliði Vignisson, bæjarstjóri í Ölfusi, birti í gær pistil þar sem hann sakar forustumenn ríkisstjórnarinnar um að þora ekki að mæta í mæta þáttinn Spursmál hjá Morgunblaðinu. Í sama pistli hrósar hann Ara Edwald fyrir að mæta í viðtöl við alla miðla í kjölfar þess að hann var tilkynntur sem oddviti Miðflokksins í Reykjavík.

Einn af þeim sem leggja orð í belg í athugasemdakerfinu er Egill Helgason en hann stjórnaði Silfrinu í mörg ár og hægt að fullyrða að fáir þekki jafn vel í fá stjórnmálamenn í viðtöl og hann.

„Ég get svosem sagt ýmsar sögur af þessu frá því ég stjórnaði pólitískum umræðuþætti. Sá sem var alltaf til í að koma og kærði sig kollóttan um hverjum hann þurfti að mæta - Steingrímur J. Sigfússon. Sá tregasti sem vildi bara tala við suma og þá undir mjög sérstökum kringumstæðum – Davíð Oddsson. Sá sem vildi helst aldrei tala við fjölmiðla - Finnur Ingólfsson,“ skrifar Egill og var Elliði ekki lengi að svara honum.

Ekki nýjar fréttir

„Þetta hljómar dáldið eins og: "Svo skal böl bæta, að benda á annað verra". Finnst þér það ekki dapurt að forsvarsfólk ríkisstjórnar skuli ekki þora í þátt eins og þann sem Stefán Einar Stefánsson stjórnar af röggsemi? Er það ekki jafnvel enn aumkunarverðara en að héraðssaksóknari og forstjóri Samkeppniseftirlitsins (sem veita RÚV og heimildinni ítrekað viðtöl) þori ekki í þann þátt? Finnst þér, sem reyndum fjölmiðlamanni, það ekki aumt?“ skrifar Elliði.

„[Ég] hef aldrei séð þennan þátt svo ég veit ekki hvað um ræðir nákvæmlega. En þetta eru svo langt í frá nýjar fréttir. Ég reyndar ef ég væri pr-maður fyrir stjórnmálamann, þá myndi ég ráðleggja viðkomandi að fara sjaldan í viðtöl, spara sjálfa sig, og velja vettvanginn og tímasetninguna vel. Má jafnvel segja að það hafi Davíð kunnað manna best. En hvort slík aðferð er endilega lýðræðislegust, það er annað mál,“ segir Egill svo að lokum.