Yfirvöld í Arizona handtóku í gærkvöldi einstakling til yfirheyrslu í tengslum við rannsókn á hvarfi Nancy Guthrie, móður bandarísku sjónvarpskonunnar Savannah Guthrie, að sögn embættismanna.
Lögreglustjórinn í Pima-sýslu greindi frá því nokkrum klukkustundum síðar að leit á fasteign í Rio Rico í Arizona, sunnan við Tucson, hefði verið lokið. Rannsókn málsins væri þó enn í gangi.
Alríkislögreglan (FBI) birti í gær öryggismyndir og myndskeið af hugsanlegum aðila í rannsókninni á hvarfi móður Savönnuh Guthrie, sem er annar þáttastjórnandi bandaríska morgunþáttarins TODAY.
Á fjórum myndum má sjá einstakling í hanskum, með grímu og bakpoka, sem virðist vera að eiga við öryggismyndavél við útidyr heimilis Nancy Guthrie að morgni þess dags sem hún hvarf.
Forstjóri FBI, Kash Patel, sagði að hinn grunaði væri hugsanlega vopnaður. FBI greindi þó frá því í gær að engir grunaðir eða sérstakir aðilar hefðu enn verið skilgreindir í málinu.
Guthrie, sem var 84 ára, sást síðast við heimili sitt fyrir utan Tucson að kvöldi 31. janúar og var tilkynnt um hvarf hennar um hádegisbil 1. febrúar.
FBI sagði jafnframt í gær að stofnunin væri „ekki meðvituð um nein áframhaldandi samskipti milli Guthrie-fjölskyldunnar og grunaðra mannræningja“.
Savannah birti myndskeið á Instagram þar sem hún biðlaði til almennings um hjálp.
„Hæ öll saman.
Mig langaði að koma hér inn og deila nokkrum hugsunum þegar við göngum inn í enn eina viku þessarar martraðar.
Ég vil fyrst og fremst segja hjartans þakkir fyrir allar bænirnar og alla kærleikann sem við, systkini mín og ég, höfum fundið fyrir, og sem mamma okkar hefur fundið fyrir.
Við trúum því að á einhvern hátt, einhvern veginn, finni hún fyrir þessum bænum og að Guð sé að styrkja hana jafnvel á þessari stundu og á þessum dimmasta stað.
Við trúum því að mamma okkar sé enn þarna úti. Við þurfum á hjálp ykkar að halda.
Lögreglan vinnur sleitulaust allan sólarhringinn að því að koma henni heim, að finna hana. Hún var numin á brott og við vitum ekki hvar hún er. Og við þurfum hjálp ykkar.
Ég er því að koma hér fram til að biðja ykkur ekki aðeins um bænir, heldur líka, sama hvar þið eruð, jafnvel þótt þið séuð langt frá Tucson, ef þið sjáið eitthvað, heyrið eitthvað, ef eitthvað virðist á einhvern hátt undarlegt, þá vinsamlegast tilkynnið það til lögreglu. Við erum á örvæntingarfullri stundu.
Og við þurfum hjálp ykkar.“
