Notalegt stopp á ferðalagi breyttist fljótt í óhugnanlega upplifun fyrir eina fjölskyldu eftir að hún rakst á truflandi „andlitsmynd af syni sínum“ á gistiheimili sem þeim fannst „draugalegt“. Mirror segir frá málinu.

Fjölskyldan, sem flutti frá Bretlandi til Svíþjóðar fyrir tveimur árum, var á heimleið úr skíðaferð og þurfti að stoppa yfir nótt á langri akstursleið. Móðirin, Jennie Stevenson, sagði að þau hefðu valið „afskekkt“ gistiheimili í von um að ná góðri hvíld.

Þegar fjölskyldan var að undirbúa kvöldverð í sameiginlegum borðsal tók dóttirin eftir svolitlu óvenjulegu. „Dóttir mín sagði bara: „Mamma, það er mynd af Barney á veggnum“,“ rifjaði Jennie upp.

Þegar hin þriggja barna móðir skoðaði verkið nánar kom í ljós að þar var mynd af barni sem líktist sjö ára syni hennar nánast í einu og öllu. Hún lýsti upplifuninni sem „óþægilegri“ og sagði fjölskylduna hafa orðið verulega uggandi.

Verkið ber heitið Flowers in the Meadow og er eftir sænska listamanninn Carl Larsson. Á myndinni sést ung stúlka sem líkist drengnum mjög, fyrir utan sítt hár. Barnið er með hatt og umkringt blómum.

Sem betur fer urðu foreldrarnir ekki of skelkaðir af listaverkinu og Barney sjálfum fannst atvikið meira fyndið en ógnvekjandi.

Foreldrarnir lýstu gistiheimilinu þó sem „gamaldags“ stað með „brakandi gólfum“.

Jennie sagði: „Við vöknuðum einhvern tíma við skelfilegt pappírshljóð, eins og verið væri að fletta blöðum eða spila með spilastokk, en við lifðum þetta öll af.“

Hún greindi einnig frá atvikinu á X og skrifaði: „Nýkomin á afskekkt sveitagistiheimili og finnum málverk þar sem yngsta barnið okkar er sýnt sem lítil stúlka. Það er auðvitað engin skelfileg fordæmi fyrir slíku, svo þetta hlýtur að vera í lagi.“

Aðrir notendur samfélagsmiðla buðu fram sínar kenningar. Einn stakk upp á því að hljóðið hefði verið „barnið að reyna að sleppa út úr málverkinu“.

Annar spurði hvort nornir væru á svæðinu. Jennie svaraði: „Í Svíþjóð fljúga allar nornir til Bláfjalla um páskana, svo ég geri ráð fyrir að svarið sé já?“