Maður sem fékk ekki eina afmæliskveðju á afmælisdaginn sinn hefur vakið mikla athygli á samfélagsmiðlum eftir að pizzastaður sýndi honum óvænta hlýju.

Maðurinn sagðist hafa orðið fyrir vonbrigðum þegar enginn úr fjölskyldu hans hafði samband á afmælisdeginum. Til að halda upp á daginn einn síns liðs pantaði hann pizzu og skrifaði athugasemd með pöntuninni þar sem hann óskaði eftir sem flestum svörtum ólífum.

„Það er afmælið mitt og ekki einu sinni fjölskyldan mín hringdi í mig. Ég er leiður og ég elska ólífur,“ skrifaði hann meðal annars og bætti við að hann vildi „svo margar ólífur að þið farið að efast um bæði mína og ykkar eigin geðheilsu“.

Þegar pizzan barst var hún þakin ólífum og á pizzakassanum hafði verið teiknuð afmæliskaka ásamt orðunum „Happy Birthday“.

„Stundum geta jafnvel minnstu hlutir skipt mestu máli,“ sagði maðurinn eftir að hann fékk sendinguna.

Fjöldi netverja deildi eigin reynslu í athugasemdum við færsluna. „Ég skil þessa tilfinningu nákvæmlega,“ skrifaði einn notandi sem sagði systkini sín hafa gleymt fimmtugsafmæli hans, þar til degi seinna. „Það hefði dugað að muna daginn og senda skilaboð. Kannski hefði ég átt að panta pizzu.“

Annar notandi sagði færsluna bæði sorglega og hlýja, á meðan sá þriðji taldi „nánast glæpsamlegt“ að nafn veitingastaðarins væri ekki nefnt, þar sem hann ætti allt hrós skilið.