Það var mikill hiti í þingmönnum á Alþingi fyrr í dag en þá óskaði hluti stjórnarandstöðu eftir því að dagskrá dagsins í dag yrði breytt og var gengið til atkvæða um málið og gerðu ýmsir þingmenn grein fyrir atkvæði sínu.

Eitthvað virðist hafa klikkað því þegar Þórunn Sveinbjarnardóttir, forseti Alþingis, tilkynnti að atkvæðagreiðslu og ræðum um málið væri lokið barst kall úr þingsal, sennilega frá Sjálfstæðismanninum Vilhjálmi Árnasyni, um að það hefðu ekki allir fengið að tala sem óskuðu eftir því. Þórunn neitaði fyrir að hafa gert mistök og sagði að umræðunni væri lokið.

Næsti dagskráliður var síðan um störf þingsins og lét Þorgrímur Sigmundsson, þingmaður Miðflokksins, forsetann heyra það og sakaði hana um þöggun, án þess þó að notast við það orð.

„Forseti frábiður sér dylgjur þingmannsins,“ sagði Þórunn í kjölfar ræðu Þorgríms.