Erlingur Erlingsson hernaðarsagnfræðingur hefur áhyggjur af framtíð íbúa Úkraínu eftir að Donald Trump, forseti Bandaríkjanna, greindi frá því að Bandaríkin myndu hætta að senda vopn og upplýsingar til Úkraínu.

Sú ákvörðun var tekin eftir stórfurðulegan fund Trump og Volodymyr Zelensky, forseta Úkraínu, í Hvíta Húsinu fyrir stuttu en vakti fundurinn mikla athygli um allan heim.

„Það sorglegasta við að Bandaríkin skrúfa fyrir þessar vopnasendingar og upplýsingamiðlun er að þetta veikir mjög loftvarnagetu Úkraínumanna. Hún hefur sérstaklega miðað að því að stöðva loftárásir Rússa sem eru daglegt brauð í hundraðatali með drónum og eldflaugum á úkraínskar borgir og borgaralega innviði. Í raun og veru eru úkraínskir borgarar miklu berskjaldaðri fyrir árásum Rússa út af því sem Bandaríkin eru að gera,“ sagði Erlingur í Morgunútvarpinu á Rás 2.

Hann telur þó ekki að þessi ákvörðun Trump muni hafa mikil áhrif á hernaðinn á víglínu stríðsins og bendir á orð fólks sem hefur starfað í varnarmálaráðuneytum Bretlands og Bandaríkjanna í því samhengi.