Stjórn Eflingar stéttarfélags samþykkti í gær, 8. janúar, ályktun þar sem hernaðaraðgerðir Bandaríkjanna í Venesúela eru harðlega fordæmdar. Í ályktuninni er jafnframt krafist að íslensk stjórnvöld beiti sér fyrir friðsamlegum og diplómatískum lausnum á alþjóðavettvangi.
Í ályktun stjórnarinnar segir að Efling fordæmi „harðlega hernaðaraðgerðir Bandaríkjanna gegn Venesúela og mannránið sem framið var á forseta landsins, Nicolás Maduro, og Ciliu Flores, eiginkonu hans“.
Stjórnin segir að aðgerðir Bandaríkjanna feli í sér „skýrt brot á alþjóðalögum og sáttmála Sameinuðu þjóðanna“ og líti á þær sem enn eina staðfestingu á „stórhættulegri árásargirni heimsvaldastefnunnar“. Í ályktuninni er bent á að Bandaríkin hafi um áratugaskeið komist upp með slíkt framferði án þess að raunverulegar tilraunir hafi verið gerðar til að stöðva það.
„Afleiðingin er sú að bandarísk stjórnvöld telja sig nú geta gert allt sem þeim sýnist, hversu siðlaust og glæpsamlegt sem það er gagnvart saklausum almenningi um allan heim,“ segir í ályktuninni.
Stjórn Eflingar undirstrikar að ekki sé hægt að una við „óöld og lögleysu á vettvangi alþjóðastjórnmála“ og að bregðast verði við ólöglegum aðgerðum Bandaríkjanna með „alþjóðlegri andspyrnu og andófi“.
Í lok ályktunarinnar mótmælir Efling „ofbeldi og yfirgangi heimsvaldasinna“ og setur fram þá kröfu að íslensk stjórnvöld vinni markvisst að friðsömum og diplómatískum lausnum í alþjóðasamstarfi.
