Styrkur svifryks (PM10) mældist hár á loftgæðamælistöðvum í Reykjavík í morgun. Samkvæmt mælingum var styrkurinn sérstaklega mikill við Grensásveg þar sem gildi PM10 náði 171,4 míkrógrömmum á rúmmetra klukkan 12 í dag, en til samanburðar eru sólarhringsheilsuverndarmörk 50 míkrógrömm á rúmmetra.
Að sögn Heilbrigðiseftirlits Reykjavíkur er uppruni ryksins fyrst og fremst frá umferð. Þar sem götur eru þurrar mælist einnig hátt svifryk á stöðvum sem eru fjær stærstu umferðaræðum. Stefnt er að því að rykbinda í borginni í nótt til að draga úr uppþyrlun ryks, en rykbinding er samvinnuverkefni Reykjavíkurborgar og Vegagerðarinnar.
Gert er ráð fyrir svipuðum veðuraðstæðum um helgina og eru vonir bundnar við að rykbinding muni draga úr svifryksmengun á næstu dögum.
Viðkvæmir hópar, svo sem einstaklingar með öndunarfærasjúkdóma, aldraðir og börn, eru hvattir til að forðast útivist í lengri tíma og takmarka áreynslu á meðan mengunin er mikil. Almenningur er jafnframt hvattur til að draga úr notkun einkabíla, meðal annars með því að fresta ferðum sem ekki eru nauðsynlegar, nýta almenningssamgöngur, samnýta bíla eða velja vistvænni samgöngumáta.
Fyrirtæki eru hvött til að huga að fjarvinnu fyrir starfsfólk á svifryksdögum, sé þess kostur, og draga úr akstri ef mögulegt er.
Heilbrigðiseftirlit Reykjavíkur fylgist náið með loftgæðum borgarinnar og sendir frá sér viðvaranir og leiðbeiningar ef þörf krefur. Almenningur getur fylgst með stöðu loftgæða á vefnum loftgæði.is, þar sem finna má kort yfir mælistaði í Reykjavík og víðar um landið.
Svifryk eru fínar rykagnir sem eiga greiða leið niður í öndunarfæri og geta haft áhrif á heilsu, sérstaklega hjá viðkvæmum einstaklingum. Helstu uppsprettur svifryks eru uppspænt malbik, sót frá díselbruna, jarðvegsagnir, salt og aska.
