Talið er að örverumengun í grænmetisbollum hafi valdið veikindum fimmtán barna í grunn- og leikskóla Fáskrúðsfjarðar fyrir um tveimur vikum. Samkvæmt fyrirliggjandi upplýsingum hefur enginn veikst alvarlega.

Þetta kemur fram í tilkynningu frá Fjarðabyggð en Austurfrétt fjallaði um málið. Þar er greint frá því að í mötuneyti Skólamiðstöðvarinnar á Fáskrúðsfirði snæði daglega um 140 nemendur auk 30 starfsmanna. Vitað er að 12 leikskólabörn og þrír nemendur í grunnskóla veiktust og fóru heim sama dag.

Heilbrigðisstofnun Austurlands (HSA) var látin vita af veikindunum. Í tilkynningunni segir að ekki liggi fyrir upplýsingar um að nein börn hafi leitað til HSA vegna eitrunarinnar.

Þegar grunur vaknaði um matareitrun var haft samband við Heilbrigðiseftirlit Austurlands, sem tók sýni úr matnum. Grunur beindist snemma að grænmetisbollunum. Niðurstöður sýnatöku benda til þess að Bacillus cereus toxin (Cereulide toxin) hafi myndast við framleiðslu vörunnar hjá framleiðanda.

Þar kemur fram að bakterían drepist við hitun, en eitur hennar sé hitaþolið og eyðist því ekki við hitun í 72°C (þolir hitun upp í 121°C). Af þeim sökum er talið að uppruni matarsýkingarinnar sé hjá framleiðanda vörunnar en ekki í eldhúsi Skólamiðstöðvarinnar. Varan var innkölluð í síðustu viku.