Úthlutun úr afrekssjóði í skák fyrir árið 2026 liggur nú fyrir en greint er frá þessu í tilkynningu frá stjórnvöldum.

Alls hljóta 13 skákmenn styrki á árinu 2026 en 15 umsóknir bárust þar af 5 í flokkinn efnilegir skákmenn og 10 í flokkinn afreksskákmenn.

Við mat á umsóknum í flokkinn efnilegir skákmenn var tekið tillit til aldursskilyrða, árangurs og virkni árið 2025 og áætlana um virkni í skák sem umsækjandi lagði fram fyrir árið 2026.

Við mat á umsóknum í flokkinn afreksskákmenn var litið til stöðu á heimslista, virkni síðastliðið ár með tilliti til fjölda tefldra kappskáka, og áætlana um virkni á árinu 2026.

Mánaðarlegir styrkir til afreksskákmanna á árinu 2026 eru 550.000 kr. en 250.000 kr. hjá efnilegum skákmönnum. Um verktakagreiðslur er að ræða.

Úthlutunin nær yfir tímabilið 1. janúar – 31. desember 2026. Stórmeistarinn Vignir Vatnar Stefánsson fékk úthlutað úr sjóðnum til þriggja ára.