Ungir Sjálfstæðismenn hæðast að Samfylkingunni í nýrri Facebook-færslu þar sem lýsa eftir sleggjunni sem Kristrún Frostadóttir notaði í frægri auglýsingu fyrir síðustu alþingiskosningar.

Í morgun tilkynnti Peningastefnunefnd Seðlabanka Íslands ákvörðun sína að hækka stýrivexti úr 7,25 prósentum í 7,50 prósent en Samfylkingin lofaði því fyrir síðustu þingkosningar að berja niður vexti en Kristrún sýndi það með tilþrifum, haldandi á níðþungri sleggju.

Ungir Sjálfstæðismenn birtu í dag gervi-auglýsingu á Facebook-vegg sinn sem lítur út eins og auglýsing á Brask og Brall, þar sem auglýst er eftir sleggjunni sem Kristrún notaði í téðri auglýsingu. Í auglýsingunni stendur:

„SUS leitar að þessari sleggju sem sést á myndinni (þung, með löngu skafti).

Ekki er ljóst um staðsetningu hennar núna en hún sást í kosningaauglýsingu Samfylkingarinnar fyrir kosningar.

Gerum ráð fyrir að sleggjan sé í góðu standi, enda lítið notuð eftir kosningar.

Opin fyrir verðtilboðum - Okkur bráðvantar hana einmitt núna.“