Hætt verður við áform um byggingu nýs unglingaskóla í Laugardal á svokölluðum þríhyrningi aftan við Skautahöllina. Þetta var samþykkt á fundi borgarráðs í morgun, þar sem jafnframt var ákveðið að skoða aðra mögulega staðsetningu og hefja samráðsferli að nýju með helstu hagaðilum í hverfinu um framtíðarskipulag skóla- og íþróttamannvirkja á svæðinu.

Tillagan var lögð fram af Heiðu Björgu Hilmisdóttur borgarstjóra, sem segir að um sé að ræða framkvæmd sem hafi víðtæk og langvarandi áhrif.

„Með uppbyggingu unglingaskóla í Laugardal verður til menntastofnun sem verður áhrifavaldur í lífi ungmenna í hverfinu í marga áratugi og setur mark sitt á allt annað skólastarf í Laugardalnum. Slík framkvæmd er af þeirri stærðargráðu að hún þarf að vera vönduð og standast tímans tönn,“ segir Heiða Björg.

Í kjölfar ákvörðunar borgarráðs verður farið í endurskoðun á þeim sviðsmyndum sem settar voru fram í skýrslu starfshóps um undirbúning framkvæmda árið 2023. Skipaður verður nýr starfshópur sem mun kalla til helstu hagaðila í Laugardal til samráðs um framtíðarsýn varðandi staðsetningu skóla- og íþróttamannvirkja.

Borgarstjóri segir að reynslan hafi sýnt að fyrri ákvarðanir hafi ekki staðist nægilega vel.

„Því miður hefur komið í ljós að fyrri ákvarðanir voru einfaldlega ekki á nægilega traustum grunni byggðar,“ segir hún og bætir við að nauðsynlegt sé að taka málið upp að nýju. „Og þess vegna er nauðsynlegt að vinna málið betur. Þess vegna var það tillaga mín að hætta við fyrri áform og endurskoða staðarval í betra samkomulagi við unglingana, foreldra, íbúa og aðra hagaðila í Laugardalnum.“

Hér má sjá fundagerð borgarráðs.