Tónlistarunnendur geta átt von á skemmtilegri upplifun á Borgarbókasafnið um helgina þegar tónlistarkonan Greta Salóme stígur á svið á Dægurflugum í hádeginu ásamt úrvals hljóðfæraleikurum. Með henni koma fram Gunnar Hilmarsson, Leifur Gunnarsson og Óskar Þormarsson. Fólk ætti „ekki að láta sig vanta” eins og segir í tilkynningu frá Borgarbókasafninu
Á dagskránni verða vinsæl lög í léttum og hröðum „gypsy-djass” stíl, meðal annars eftir Stéphane Grappelli og Django Reinhardt. Flutt verða þekkt lög eins og Tiger Rag, Minor Swing og Swing Guitars, auk annarra dægurlaga þar sem fiðlan fær að njóta sín.
„Til að spila eins og Grappelli þarf maður að snúa öllu á haus sem maður hefur lært í klassíkinni,“ er haft eftir Gretu. „Þá swingar maður.”
Tónleikarnir eru hluti af vinsælu tónleikaröðinni Dægurflugur í hádeginu, þar sem gestum gefst einnig kostur á að spjalla við tónlistarfólkið að loknum flutningi.
Tónleikarnir fara fram í Gerðubergi föstudaginn 10. apríl kl. 12:15 og í Spönginni laugardaginn 11. apríl kl. 13:15.
Aðgangur er ókeypis og allir velkomnir.
