Susie Wiles, starfsmannastjóri Donalds Trump Bandaríkjaforseta, hefur greinst með brjóstakrabbamein. Þetta kemur fram í frétt Reuters.

Trump greindi frá tíðindunum á samfélagsmiðlinum Truth Social.

„Susie Wiles er ótrúlegur starfsmannastjóri, frábær manneskja og ein sterkasta manneskja sem ég þekki. Því miður hefur hún greinst með brjóstakrabbamein á byrjunarstigi og hefur ákveðið að takast strax á við þetta verkefni í stað þess að bíða,“ skrifaði hann.

Hann bætti við að horfur hennar væru góðar.

„Hún er með frábært læknateymi og horfur hennar líta mjög vel út.“

Wiles hefur oft verið kölluð helsti skipuleggjandi kosningasigurs Donalds Trump í forsetakosningunum árið 2024.

Þegar Trump sór embættiseið sem forseti gaf hann henni viðurnefnið „ísdrottningin“.

Samkvæmt Trump mun Wiles halda áfram störfum sínum í fullu starfi á meðan meðferð stendur yfir, en vinna fjarvinnu.