Elva Dagmar Simundsson bókasafnsfræðingur lést 4. apríl síðastliðinn.

Morgunblaðið greindi frá andláti hennar

Hún fæddist 28. janúar 1950 á spítalanum í Árborg í Geysisbyggð í Manitoba í Kanada og ólst upp í sveitinni þar sem hún mótaðist af sterkum tengslum við íslenskan menningararf.

Foreldrar hennar voru Gunnar og Margrét Sæmundsson, bændur á Breiðabliki. Elva lauk BA-prófi í ensku og sögu frá Manitoba-háskóla í Winnipeg og síðar meistaraprófi í bókasafns- og upplýsingafræði frá Háskóla Bresku Kólumbíu í Vancouver.

Eftir að hún og eiginmaður hennar, Jerry Jónasson, létu af störfum fluttu þau til Gimli. Þar sinnti Elva fjölbreyttum sjálfboðastörfum, meðal annars við Safn íslenskrar menningararfleifðar, og átti þátt í stofnun íslenskra sumarbúða. Hún kenndi íslensku og lagði sitt af mörkum til varðveislu tungumáls og menningar.

Elva var virk í félagsmálum, sat í stjórnum íslenskra félaga og tímarita og stundaði íshokkí fram á miðjan aldur. Hún hlaut viðurkenningu fylkisstjóra Manitoba árið 2022 fyrir framlag sitt til íslenskrar menningararfleifðar.