Mennta- og barnamálaráðuneytið hefur boðað fulltrúa allra skólaráða á kynningarfundi um fyrirhugað símafrí í grunnskólum en greint er frá þessu í tilkynningu frá stjórnvöldum

Á fundunum verða kynnt drög að nýrri reglugerð um notkun síma og snjalltækja í grunnskólum sem fara í Samráðsgátt stjórnvalda í júní.

Markmið reglugerðarinnar er að takmarka notkun síma og annarra snjalltækja barna og ungmenna á skólatíma, samræma reglur milli skóla og stuðla að betra náms- og félagsumhverfi fyrir nemendur. Þá er einnig stefnt að því að styðja við faglegt skólastarf og vellíðan barna í skólum.

Samkvæmt áformunum verður notkun síma og snjalltækja sem ekki eru í eigu eða umsjá skóla óheimil á skólatíma. Einnig er gert ráð fyrir að tæki í eigu skóla verði eingöngu notuð í kennslufræðilegum tilgangi eða vegna stuðningsþarfa nemenda.

Nýverið hélt mennta- og barnamálaráðherra vinnustofu með börnum og ungmennum þar sem kallað var eftir sjónarmiðum þeirra um símanotkun í skóla- og frístundastarfi. Með fundunum og umsagnarferlinu vilja stjórnvöld safna frekari endurgjöf frá skólasamfélaginu og almenningi.