Ritstjóri Wikileaks, Kristinn Hrafnsson skýtur bylmingsfast á KKÍ og íslenska karlalandsliðið í körfuknattleik en liðið tapaði í dag fyrir Ísrael í EM í Póllandi.

Í nýrri Facebook-færslu birtir Kristinn skjáskot úr frétt þar sem sagt er frá meiðslum landsliðsmannsins Hauks Helga Pálssonar, sem segist í fréttinni hafa brotnað niður þegar hann tilkynnti félögum sínum í liðinu að hann gæti ekki keppt á mótinu. Kristinn segir í færslunni hafa haldið að Haukur Helgi hefði brotnað niður af annarri ástæðu:

„Ég hélt í alvöru að landsliðsmaðurinn í körfubolta hefði brotnað saman og grátið af skömm þegar hann tilkynnti liðsfélögunum að þeir væru að fara að keppa við landslið þjóðarmorðingja. Það var ekki svo.“

Því næst segir ritstjórinn KKÍ að skammast sín:

„Þessi svívirða heldur áfram og brýtur gegn öllu velsæmi. Skammist ykkar og öll ykkar hreyfing. Aðalmaðurinn í liðinu sem þið eruð að mæta mun víst vera Deni Avdija.“

Að lokum segist Kristinn birta ljósmynd af landsliðsmanninum ísraelska í herbúningi ísraelska hersins.

„Læt fylgja mynd af honum stoltum í einkennisbúningi Ísraelshers þeim sama og myrti á dögunum hjálparstarfsmenn og blaðamenn, hefur þegar myrt tugþúsundir palestínskra barna og er að svelta hundruð þúsunda í manngerðri hungursneyð.“