Rithöfundurinn og fyrrverandi þingmaðurinn Margrét Tryggvadóttir lætur óánægju sína í ljós með breytingar á Messenger-þjónustu Facebook í færslu á samfélagsmiðlum, þar sem hún gagnrýnir hvernig notendur séu í auknum mæli neyddir til að opna Facebook-síðuna sjálfa í vinnu og daglegum samskiptum.

Margrét lýsir því hvernig hún hafi lengi forðast að opna Facebook yfir daginn og notað Messenger.com sérstaklega til samskipta í tölvu:

„Andskotans djöfulsins helvítis pakk! Sko, flesta daga sit ég við tölvu og hef símann einhvers staðar þar sem hann truflar ekki. Ég nota messenger mjög mikið og vil geta gert það í tölvunni án þess að opna Facebook með allri þeirri satanísku truflun sem því fylgir.“

Hún segir að þar til nýlega hafi Messenger-forrit í tölvu leyst málið, en það hafi hætt að virka:

„Þar til nýlega var ég með messenger app í tölvunni minni. Gat sem sagt verið í samskiptum yfir daginn um fundi, verkefni, kvöldmatinn og hundapössun algjörlega án þess að opna Facebook.“

Eftir að forritið var lagt niður hafi hún fundið aðra leið:

„Svo hætti appið fyrir nokkrum mánuðum og hafði greinilega ekki verið viðhaldið því það var farið að hökkta. Hvað gerði kona þá. Jú opnaði sérstakan glugga í vafra sem var bara með messenger.“

Hún segir að þannig hafi hún getað unnið áfram án þess að þurfa að opna Facebook, þar til ný tilkynning birtist:

„Ha, ha, hún þyrfti aldrei að opna Facebook í vinnunni og heldur ekki símann. En nú birtist þessi tilkynning á skjánum og mig langar virkilega að draga einhvern til ábyrgðar.“

Færslunni lýkur á tilvísun í Þursaflokkinn:

„Nútíminn er trunta.“