Sigurvegari Eurovision 2024, Nemo frá Sviss, hefur lýst því yfir að þau styðji ekki áframhaldandi þátttöku Ísraels í keppninni. Í viðtali við HuffPost UK sögðu þau: „Mér finnst það órökrétt að að Ísrael taki þátt í Eurovision núna.“
Nemo vann keppnina í fyrra með laginu The Code á umdeilnu ári þar sem þátttaka Ísraels olli miklum deilum vegna þjóðarmorðs Ísraela á Palestínumönnum. Á þeim tíma voru þau einnig meðal níu listamanna sem lýstu yfir samstöðu með Palestínu í sameiginlegri yfirlýsingu fyrir útsendingu keppninnar.
Tugir tónlistarfólks sem tengst hefur Eurovision, þar á meðal tveir fyrrverandi sigurvegarar, skrifuðu nýverið opið bréf þar sem krafist var útilokunar Ísraels úr keppninni 2025. Nemo hefur nú bæst í þann hóp og sent frá sér yfirlýsingu þar sem þau segja: „Ég styð kröfuna um að Ísrael verði útilokað úr Eurovision. Aðgerðir Ísraels stangast á við þau gildi sem keppnin á að standa fyrir — frið, samstöðu og mannréttindi.“
Í yfirlýsingu í vikunni sagði Evrópusamband útvarpsstöðva (EBU) að keppnin ætti að vera alþjóðleg samverustund sem stuðlar að fjölbreytni og tengslum þvert á menningarheim, og benti á að EBU sé samstarf opinberra fjölmiðla, ekki ríkisstjórna.
Þrátt fyrir skýra afstöðu sína studdi Nemo keppnina í fyrra og sagði þau aldrei hafa íhugað að draga sig út: „Ég hafði sögu að segja og þetta var mín leið til að koma henni á framfæri. Ef ég segi hana ekki, gerir það enginn annar.“
„Svo heimskulegt“
Þau gagnrýna einnig nýjar reglur Eurovision um fánanotkun. Samkvæmt þeim má áhorfendafjöldinn veifa hvaða fánum sem er, svo lengi sem þeir brjóta ekki svissnesk lög, en listamenn mega einungis sýna fána síns eigin lands á sviði eða í opinberum rýmum. Þetta þýðir að regnbogafánar og aðrir fánar hinsegin samfélagsins eru bannaðir á sviðinu.
„Þetta er svo heimskulegt,“ sagði Nemo. „Hvernig getur keppni sem er svona samofin hinsegin menningu og verið tákn um fjölbreytileika og frelsi bannað Pride-fánann?“
Nemo sagðist í fyrra hafa þurft að smygla inn hinsegin-fána og fengið þau skilaboð að þau mættu ekki sýna hann á sviði, þótt EBU hafi síðar haldið því fram að bannið hafi ekki verið í gildi. „En í ár eru þeir svo opinberlega búnir að banna fána á sviðinu. Ég veit það ekki, þetta finnst mér mjög skrítið.“
Nemo verður gestaatriði í Eurovision 2025, sem fer fram í Basel síðar í maí. Þau hafa einnig nýlega gefið út lagið Casanova, sem fylgt er eftir með myndbandi.
Komment