Laugardaginn 7. mars fer fram ráðstefnan Hryllingsflóðið – ráðstefna um barna- og unglingabókmenntir á Borgarbókasafninu í Gerðubergi. Að þessu sinni verður sérstök áhersla lögð á hryllingsbókmenntir fyrir börn og unglinga.

Gestum verður boðið að sækja safnið og hlýða á fjölbreytt erindi auk þess að taka þátt í umræðum um hlutverk og stöðu bókmennta fyrir börn og ungmenni í samtímanum.

Eins og heiti ráðstefnunnar gefur til kynna er þema hennar í ár hryllingur í barna- og unglingabókmenntum. Aðstandendur ráðstefnunnar benda á að hryllingssögur hafi um aldir verið vinsælar meðal bæði barna og fullorðinna. Á síðari árum hafi áhugi á slíkum sögum aukist enn frekar, meðal annars með aukinni útbreiðslu hrekkjavöku í íslensku menningarlífi. Á haustin verði því oft vart við svokallað „hryllingsflóð“ í útgáfu bóka fyrir yngri lesendur.

Á ráðstefnunni munu nokkrir þekktir fræðimenn og rithöfundar flytja erindi. Þar á meðal eru Arngrímur Vídalín, skrímslafræðingur og dósent í íslenskum bókmenntum fyrri alda, auk rithöfundanna Hilmars Arnar Óskarssonar, Ævars Þórs Benediktssonar og Berglindar Írisar Sævarsdóttur. Í erindum sínum munu þau nálgast hryllinginn frá ólíkum sjónarhornum og meðal annars fjalla um ofbeldi, erótík og mörkin milli hrolls og húmors í bókmenntum fyrir unga lesendur.

Fundarstjóri ráðstefnunnar verður rithöfundurinn Elísabet Thoroddsen.