Ragna Sigurðardóttir, læknir og þingmaður Samfylkingarinnar er komin í veikindaleyfi. Þetta tilkynnti hún á Facebook.

Þinkonan og læknirinn Ragna Sigurðardóttir tilkynnti á Facebook í gærkvöldi að hún væri komin í veikindaleyfi frá þingstöfum vegna meðgöngunnar en hún er komin 33 vikur á leið.

„Kæru vinir,

Ég er komin í veikindaleyfi frá þingstörfum vegna meðgöngunnar. Í minn stað er kominn frábær varaþingmaður, Sigurþóra Bergsdóttir, sem hefur tekið mitt sæti í velferðarnefnd og efnahags- og viðskiptanefnd og á Alþingi.“ Þannig hefst tilkynning Rögnu en í næstu orðum segir hún að fyrstu mánuðirnir á þingi hafi verið „magnaðir“. Notar hún lýsingarorð á borð við áhugavert, lærdómsríkt og skemmtilegt, til að lýsa nefndarstarfinu.

„Það hafa verið magnaðir fyrstu mánuðir á þingi - ég tel mig heppna og er þakklát fyrir tækifærið að sinna þingstörfum fyrir þjóðina. Nefndarstarfið hefur verið gefandi, áhugavert, lærdómsríkt og skemmtilegt - og starfið í þingsal Alþingis ekki síður áhugavert. Samstarfsfólkið mitt í þingflokki Samfylkingarinnar er í fremstu röð og samstarfið við þingmenn stjórnarflokkanna hefur verið frábært. Þá hef ég eignast vini úr öllum flokkum og mun sakna sætisfélaga minna í þingsal!“

Þá segist Ragna hefði viljað ná að fylgja öllum hennar málum út úr nefnd en vegna meðal annars tafaleikja, hafi þau ekki öll komist að í tæka tíð.

„Ég hefði viljað fylgja öllum fimm málunum sem ég var framsögumaður fyrir í velferðarnefnd út úr nefnd og í aðra umræðu í þingsal en meðal annars vegna langra umræðna (og tafaleikja í sumum tilvikum) komust þau ekki öll að í tæka tíð. Ég vil þakka félögum mínum Kristjáni Þórði og Sigurþóru fyrir að flytja þau mál í minni fjarveru - og frábæru nefndasviði Alþingis fyrir alla aðstoð við undirbúning.“

Að lokum segir Ragna undirbúning fyrir fæðinguna vera framunda en að markmiðið sé að halda drengnum inni eins lengi og hægt er.

„Nú er undirbúningur fyrir barnsburð framundan og stærsta nýja hlutverk okkar Árna í lífinu. Ég er gengin tæplega 33 vikur í dag og drengurinn sem á eftir að fæðast er því strax orðinn móðurbetrungur þar sem mamma hans fæddist eftir rúmlega 32 vikna meðgöngu. Markmiðið er að halda honum inni aðeins lengur - helst fulla meðgöngu - hlusta á líkamann, samdrættina og fara sér hægt.

Ég hlakka til hlutverksins framundan meðan ég þakka fyrir tækifærin síðustu mánuði til að hafa áhrif. Þar til næst!“