Ragnar Þór Ingólfsson fékk að svara fyrir að vera kallaður götustrákur á Alþingi þegar hann var gestur hjá Gísla Marteini Baldurssyni í þætti hans á RÚV í gærkvöldi.

Fáir vita að Ragnar Þór, sem er uppalinn í Breiðholtinu, var ekki saklaus af því að hafa rappað sem ungur piltur. Sjálfur sagðist hann hafa litið út fyrir að vera 12 ára þegar hann var sextán og rappaði.

Fyrrverandi ráðherra og núverandi þingmaður Sjálfstæðisflokksins, Jón Gunnarsson, hafði sagt Ragnar vera eins og „ótíndur götustrákur“ vegna frumvarps hans um að tengja lífeyrisgreiðslur sjálfkrafa við þróun launavísitölu. „Hvaða kom þetta fyrirbæri hingað inn á þing?“ spurði hann, degi áður en hann baðst afsökunar.

Sjálfur segist Ragnar hafa verið týndur sem ungur maður, en nú sé hann ótíndur.

Gísli Marteinn, fæddur 1972, og Ragnar, fæddur 1974, gengu í sama skóla og fullyrðir Gísli að Ragnar hafi verið í fyrstu rapphljómsveit Breiðholtsins.

Í rappatriðinu í Breiðholti 1989 fjallaði Ragnar Þór um frægðina, sem hann hefur nú loks innsiglað.

„Ég heiti Raggi er fínn og smár,“ rappaði Ragnar. „Ef ekki verðum frægir á þessu ári, þá detti allar dauðar lýs úr mínu hári.“

Í nýju rappi hjá Gísla Marteini ávarpaði Ragnar ráðherra „tvöfaldan lás“, sem vísar í gagnrýni stjórnarandstöðunnar um að lífeyrisþegar muni hækka í tekjum bæði ef verðlag hækkar og ef almenn laun hækka, sem þeir telja of dýrt fyrir ríkissjóð.

Þessu svaraði Ragnar, ráðherrann rappandi.

„Lífeyrir hann tengist, vísitölu í. Hvernig getur nokkur maður brjálast yfir því? Bætur hafa hækkað, varla balabaun. Ég vil bara að allir fái mannsæmandi laun.“