Stórglæsilegt einbýlishús innst í botnlanga í Akrahverfinu í Garðabæ hefur verið sett á sölu fyrir 450 milljónir króna.

Um er að ræða 456 fermetra eign sem reist var árið 2008 og hefur vakið athygli fyrir vandaðan frágang, aukna lofthæð og metnaðarfulla hönnun.

Húsið var teiknað af arkitektinum Sigurði Hallgrímssyni og innanhússhönnun er í höndum Guðbjargar Magnúsdóttur. Útkoman ber þess skýr merki; eignin er bæði stílhrein og afar glæsileg þar sem hver einasti detal er útfærður í hæsta gæðaflokki.

Eignin skiptist í fjögur rúmgóð svefnherbergi, þrjár stofur, þrjú baðherbergi, eldhús, tómstundarherbergi og rúmgóða bílageymslu. Í stofu er arinn sem setur notalegan svip á rýmið og nýtur sín vel undir mikilli lofthæðinni sem einkennir húsið.

Lóðin er fullfrágengin með fallegum og skjólsælum garði. Þar er sólpallur og heitur pottur sem skapar kjöraðstæður til útivistar allt árið um kring. Staðsetningin innst í botnlanga tryggir aukið næði og rólegt umhverfi, sem gerir eignina sérstaklega eftirsótta fyrir fjölskyldur sem vilja sameina rými, gæði og friðsæla staðsetningu.