Til sölu er 66,2 fermetra einbýlishús á baklóð í rólegu og fjölskylduvænu hverfi í Kópavogi. Húsið stendur á skjólgóðum stað, snýr í suður og er allt á einni hæð. Eignin er laus til afhendingar við kaupsamning.

Húsið hefur gengið í gegnum umfangsmiklar endurbætur að innan samkvæmt fasteignaauglýsingunni. Þar má nefna nýtt gólfefni, endurnýjaðar lagnir og rafmagn að hluta, nýtt hitavatnsinntak og nýjar loftljósalausnir. Allar ofnalagnir hafa verið endurnýjaðar ásamt nýjum ofnum frá Vatnsvirkjanum. Þá hefur verið sett ný útidyrahurð og ljósleiðari tengdur í húsið.

Skólplögn í og út úr húsinu hefur verið endurnýjuð, milliveggir klæddir upp á nýtt og allt málað, sem gefur eigninni ferskt og nútímalegt yfirbragð.

Húsið þarfnast viðhalds að utan, en mögulegt er að semja sérstaklega við seljanda um þá þætti.

Óhætt er að segja að verðið á húsinu veki athygli en eigendur vilja fá 79.500.000 milljónir en það er vel yfir milljón fyrir hvern fermetra. Slíkt á yfirleitt aðeins við um glæný lúxushús á eftirsóttustu stöðum höfuðborgarsvæðisins.