Ein þekktasta baráttukona Íslands fyrir mannréttindum innflytjenda vaknaði í morgun við ógnandi smáskilaboð.

„Þú ert ekki bara forljótasta konan á Íslandi heldur líka sú mest illrættasta ógeðslega tæfa sem fyrirfinnst á jarðríki,“ ritaði sendandinn meðal annars í skilaboðum sínum til Semu Erlu Serdaroglu, sem er aðjúnkt við menntavísindasvið Háskóla Íslands.

„Þessi sms skilaboð biðu mín þegar ég vaknaði í morgun. Ég ætla ekki að kafna í þessum skít og skila hér með skömminni til raunverulegs eiganda hennar,“ segir Sema Erla á Facebook. „Ef einhver veit hver á þetta símanúmer myndi ég gjarnan vilja heyra frá viðkomandi. Ég er aðeins öruggari ef ég veit hvaða fólk ógnar tilverurétti mínum.“

„Þetta þarfg að komast á borð lögreglu,“ segir Felix Bergsson, söngvari og útvarpsmaður.

Mörg segja frá því undir færslu Semu að þau hafi hringt í númerið, en ekki hafi verið svarað. Segir þó ein að hún hafi hringt nokkrum sinnum „og loksins svaraði kona sem sagðist vera stödd erlendis og skellti á“.

Um helgina átti sér stað mikil valdefling þjóðernissinna þegar útifundur var haldinn á Austurveli, með ræðum þekktra andstæðinga fólks af íslamstrú.