Sólveig Anna Jónsdóttir, formaður Eflingar, gagnrýnir harðlega ummæli ráðherra um að það komi engum við hvernig hún hyggst greiða atkvæði í fyrirhugaðri þjóðaratkvæðagreiðslu um áframhaldandi viðræður við Evrópusambandið.

Í Facebook-færslu sem hún birti í morgun segist Sólveig Anna eiga erfitt með að skilja þá afstöðu, sérstaklega í ljósi þess að um sé að ræða kjörinn fulltrúa sem sækist eftir völdum.

„Ömm... - getur ráðherra virkilega haldið því fram að engum komi við hvernig hún greiði atkvæði?“ skrifar hún og bætir við að þótt fólk hafi mismunandi skoðanir á stjórnmálum og umræðu um þau, þá veki slík afstaða furðu.

Hún segir það sérstaklega athyglisvert í samhengi við þjóðaratkvæðagreiðslu sem ríkisstjórnin sjálf hefur boðað.

„...er ekki voðalega skrítið að manneskja sem vill láta kjósa sig til æðstu valda lýðveldisins móðgist ægilega ef hún er spurð hvernig hún ætli sér að greiða atkvæði í þjóðaratkvæðagreiðslu sem hennar eigin ríkisstjórn hefur boðað?“ skrifar Sólveig Anna.

Sólveig Anna birtir síðan orð Ingu Sælands sem hún lét falla á Alþingi:

„Á ég ekki bara að fara með seðilinn hérna niður á Austurvöll í beinni útsendingu til að sýna öllum hvernig ég ætla að greiða atkvæði? Er ekki allt í lagi? Ég hef aldrei heyrt aðra eins fyrirspurn á ævinni. Það bara kemur akkúrat engum við hvernig ég greiði atkvæði“.