Nú er tími þorrablóta hjá íþróttafélögum genginn í garð og er varla hægt að labba á barinn án þess að rekast á stjórnmálamenn í atkvæðaveiðum fyrir komandi kosningar.

Muna margir eftir því þegar Áslaug Arna Sigurbjörnsdóttir, þingmaður og meintur stuðningsmaður Fylkis, sótti fleiri viðburði hjá öðrum íþróttafélögum en sínu eigin þegar hún reyndi að verða formaður Sjálfstæðisflokksins. Það fór eins og það fór.

Það voru hins vegar margir Köttarar steinhissa þegar þeir sáu Stefán Pálsson, varaborgarfulltrúa og stærsta stuðningsmann Fram, á þorrablóti Þróttar í gær. Þykir það sérstaklega athyglisvert í ljósi þess að þorrablót Fram var haldið á sama tíma. Það þarf að leita hátt og lágt að meiri Framara.

Ekki liggur fyrir hvort stuðningsmenn Fram muni refsa Stefáni í komandi prófkjöri og borgarstjórnarkosningum fyrir þessa hegðun en kannski líta þeir svo á að það sé næg refsing að vera stuðningsmaður Fram ...