Einstaklega glæsilegt og mikið endurnýjað einbýlishús við Bollagarða 101 á Seltjarnarnesi hefur verið sett á sölu.

Um er að ræða fasteign sem byggð var árið 1990 og hefur á undanförnum árum verið endurnýjuð að mjög miklu leyti að innanverðu með metnaðarfullum hætti.

Hönnun innanhúss var í höndum Grímu Bjargar Thorarensen og hefur að sögn seljenda verið vandað til allra verka. Áhersla var lögð á falleg efnisval, nútímalegt útlit og hlýlegt andrúmsloft þar sem smáatriðin fá að njóta sín. Niðurstaðan er stílhreint og fjölskylduvænt heimili sem sameinar þægindi og glæsileika.

Lóðin umhverfis húsið er vel hirt, gróin og skjólsæl. Árið 2025 var pallur stækkaður og endursmíðaður og þar er að finna heitan pott, útisturtu, lýsingu og garðskúr. Aðstaðan býður upp á notalegar samverustundir allan ársins hring. Góð aðkoma er að húsinu, snjóbræðsla er í bílaplani og stæði fyrir tvo bíla.

Staðsetningin þykir sérstaklega eftirsótt enda er stutt í alla helstu verslun og þjónustu, skóla og heilsugæslu. Þá eru fallegar gönguleiðir og útivistarsvæði við sjóinn í næsta nágrenni.

Ásett verð eignarinnar er 225 milljónir króna.