Lögregla á höfuðborgarsvæðinu hafði í nógu að snúast í dag og sinnti fjölbreyttum verkefnum, þar á meðal umferðarmálum, fíkniefnamálum, þjófnuðum og öðrum útköllum.
Afskipti voru höfð af ökumanni vegna gerðar og búnaðar ökutækis og má hann eiga von á sektum. Þá var ökumaður stöðvaður vegna gruns um akstur undir áhrifum fíkniefna og án ökuréttinda. Skömmu síðar var annar ökumaður stöðvaður vegna sambærilegs brots og reyndist hann jafnframt vera með fíkniefni í fórum sínum.
Lögreglu barst tilkynning um mann í annarlegu ástandi og var honum ekið í viðeigandi úrræði. Kona var handtekin vegna vörslu fíkniefna og vistuð í fangageymslu sökum ástands. Þá var maður færður á lögreglustöð eftir að hafa lagt sig fyrir utan stöðina og vistaður þar vegna vímuástands.
Tilkynnt var um minniháttar líkamsárás og liggja málsatvik fyrir. Þá var maður færður á lögreglustöð vegna gruns um akstur undir áhrifum fíkniefna. Hann reyndist sviptur ökuréttindum og hafði ítrekað ekið sviptur. Börn voru í bifreiðinni við stöðvunina.
Lögregla aðstoðaði sjúkraflutningsmenn í útkalli í tvígang á tímabilinu.
Tilkynnt var um frelsissviptingu og vörslu fíkniefna og er málið til rannsóknar. Að svo stöddu eru ekki veittar frekari upplýsingar um það mál.
Farið var í tvígang með stuttu millibili í matvöruverslun vegna þjófnaðar og síðar á kaffihús vegna þjófnaðar. Þá var einnig tilkynnt um þjófnað í verslun.
Loks barst tilkynning um tilraun til íkveikju í bifreið fyrir utan heimili. Málið er í rannsókn.
