Nýtt myndband úr yfirheyrslu fyrir þingnefnd Bandaríkjaþings, sem birt var í dag, sýnir fyrrverandi Bandaríkjaforseta, Bill Clinton svara spurningum um tengsl sín við Jeffrey Epstein og ljósmyndir sem hafa komið fram í svokölluðum Epstein-skjölum.

Í yfirheyrslunni er Clinton spurður út í mynd þar sem hann sést í heitum potti á hóteli ásamt Ghislaine Maxwell og ónafngreindri konu. Þegar hann er spurður hvort fleiri hafi verið í pottinum svarar hann: „Ég held að það hafi ekki verið neinn annar í heita pottinum.“

Spyrjandi bendir þó á að á myndinni sjáist önnur kona á svæðinu við sundlaugina. Clinton segist ekki vita hver hún sé. „Já, ég veit ekki hver það er,“ segir hann.

Hann staðfestir þó að fleiri hafi verið á svæðinu við laugina það kvöld. „Nei, og svo voru aðrir í lauginni,“ segir hann þegar hann er spurður nánar út í það.

Þegar Clinton er spurður hvort fólkið hafi verið hluti af ferðahópi hans svarar hann: „Já, ég held það. Ég held að allir þarna hafi verið hluti af hópnum okkar.“

Hann segir atvikið hafa átt sér stað seint um kvöld á hóteli þar sem hópurinn dvaldi. „Nei, þetta var hótelherbergi. Súltaninn vildi að við gistum þar og þessi stóra laug var á sömu hæð og nokkrar svítur,“ útskýrir hann.

Clinton segir að hann hafi aðeins farið í stutta sundferð og setið í heita pottinum í stuttan tíma áður en hann fór að sofa. „Ég fór út, synti aðeins, sat í heita pottinum í fimm mínútur eða svo, og fór svo upp og lagði mig.“

Í lok myndbandsins er Clinton einnig spurður hvort hann hafi átt í kynferðislegum samskiptum við konuna sem sést á myndinni. Myndbandið sem birt var í dag endar áður en svar hans við þeirri spurningu kemur fram.

„Nei,“ svaraði Clinton.