Hver sérfræðingurinn á fætur öðrum í heilbrigðismálum hefur komið fram í fréttum á Vísi síðustu dagana og mælt á móti heilskimunum sem fyrirtækið Intuens auglýsir stíft fyrir um 300 þúsund krónur.
Umfjöllunin hófst með viðtali við fulltrúa Intuens, sem sagði frá því að einkennalaus maður hefði greinst með fjórða stigs krabbamein og einungis lifað af vegna heilskimunar.
Meðal þeirra sem stigið hafa fram á Vísi og varað við heilskimun eru Helga Tryggvadóttir, formaður Félags íslenskra krabbameinslækna, Tómas Guðbjartsson hjartaskurðlæknir, Halla Þorvaldsdóttir, framkvæmdastjóri Krabbameinsfélagsins, og Gunnar Þór Geirsson, formaður Félags íslenskra heimilislækna, sem segir heilskimun gera meiri skaða en gagn.
Fyrirtækið hefur fengið áhrifavalda til að kynna þjónustuna og upp á síðkastið birt viðtöl við fólk sem notar þjónustuna.
Það vandræðalega er að einn af áhrifavöldunum sem stigu fram í kynningarherferð Intuens er forstóri Sýnar, fyrirtækisins sem rekur Vísi.is, Herdís Dröfn Fjeldsted. Ekki hefur komið fram hvort hún hafi fengið afslátt af 300 þúsund króna skimuninni, sem hún segist fara reglulega í. Þess þarf þó varla, því hún var með 4,1 milljónir í mánaðarlaun 2024.
Félagið Sýn mun sjálft vera í skimunarferli með tilliti til þess að selja það í parta, eftir að hafa fallið svo mikið í kauphöllinni að það er aðeins eins þriðja virðisins sem það var fyrir þremur árum.
