Fallegt og rúmgott einbýlishús við Helguvík á Álftanesi hefur verið sett á sölu.

Um er að ræða einstaka eign á einni hæð með stórbrotnu útsýni yfir sjóinn, þar sem bæði sést til Reykjanesfjallgarðsins í suðaustri og að Snæfellsjökli í norðvestri.

Húsið stendur á 1.800 fermetra eignarlóð og er samtals skráð 202,7 fermetrar að stærð. Eignin býður upp á fjögur svefnherbergi og rúmgott fjölskyldurými sem nýtur útsýnisins til fulls.

Sunnan megin við húsið er Skógtjörn sem setur fallegan svip á umhverfið, en frá baklóðinni er greið leið um grjótgarð niður að sjó. Þar tekur við ljós og falleg sandfjara sem gefur eigninni einstakt aðdráttarafl.

Aðkoma að húsinu er snyrtileg með malarborinni innkeyrslu og steyptu sorptunnuskýli. Norðan við húsið er tyrfð lóð sem gefur möguleika á fjölbreyttri nýtingu.

Ásett verð eignarinnar er 188 milljónir króna og má búast við að hún veki athygli þeirra sem leita að sérlega vel staðsettu og fallegu sjávarhúsi á höfuðborgarsvæðinu.