Stefán Pálsson sagnfræðingur og varaborgarfulltrúi Vinstri grænna velti fyrir sér öldruninni og breytingum á útliti sínu í persónulegri og hispurslausri færslu á samfélagsmiðlum. Þar rifjar hann upp hvernig hann var sem barn ljós yfirlitum og með mikinn ljóshærðan lubba sem vakti athygli hvar sem hann fór.
„Konur stoppuðu mig á förnum vegi til að fá að strjúka höndunum í gegnum lubbann. Ég var gullfallegt barn,“ skrifar Stefán meðal annars.
Hann segir þó að hárið hafi smám saman dökknað með aldrinum og að hann hafi verið orðinn „mjög ófrýnilegur unglingur“ þegar hann fékk hlutverk í auglýsingu um ellefu eða tólf ára aldur. Þar hafi vonbrigði ríkt á meðal þeirra sem stóðu að tökunum þegar hinn áður ljóshærði drengur mætti með mun dekkra hár.
Stefán segir jafnframt að fyrstu gráu hárin hafi látið sjá sig strax á menntaskólaárunum og að hann hafi aldrei haft áhuga á að fela breytingarnar með hárlitun, þrátt fyrir hvatningu frá móður sinni.
Í færslunni segir hann að hann hafi lengi haldið í þá sjálfsmynd að vera enn ljóshærður eða að minnsta kosti dökkhærður maður „á undanhaldi“, en ný myndataka með sveitarstjórnarfulltrúum Vinstrisins hafi orðið til þess að hann þurfi nú að horfast í augu við að hann sé orðinn grá- eða hvíthærður.
„Þessir fáeinu dökku tónar í skeggrótinni sem enn streitast við njóta fyllsta stuðnings, en þetta er líklega allt að fara að enda í tárum. Þannig er það alltaf,“ skrifar Stefán að lokum.
