Tveir unglingspiltar hafa verið sakfelldir fyrir sérlega hættulega líkamsárás sem átti sér stað á Akranesi árið 2023. Þeir réðust á annan pilt, köstuðu honum í götuna, tóku hann hálstaki, spörkuðu ítrekað í höfuð hans og líkama þar sem hann lá varnarlaus.

Þeir hlutu sex mánaða skilorðsbundinn fangelsisdóm en dómurinn er skilorðsbundinn til tveggja ára

Annar var við það að verða sextán ára og hinn á sautjánda ári þegar árásin var framin. Við ákvörðun refsingar tók dómari mið af ungum aldri þeirra, en jafnframt því að árásin hafði verið skipulögð fyrir fram. Í dóminum kom fram að árásin hefði verið tilefnislaus, afar gróf og framin í sameiningu af piltunum.

Þurfa þeir báðir að greiða málsvarnarlaun verjenda sinna en sá kostnaður er í kringum eina milljón króna í báðum tilvikum.